moja mat u plasteniku prebire
najlepče krizanteme
balote vele žute biele
dvie četire deset
pun sić, dva
zgojene z velen trudon i željon
poć ćeju do našeh
ki nas čekaju na drugen kraju
moja mat broji
da ne bi kega zabila
da ki ne bi usta prez rož i svetla
kat svakkdanje krunice
nisu dosti
u vrtu su znale cvast
dalije i gladiole sveh kolori
jasmin bi se na dugo ćuti
ja bin u boške brala
visibabe i čiklamini
bilo hi je čuda
kako bieli i škuro rozasti taped
margaritice one diblje
su bile po svud naokolo
po vrtu su rasli busi
ki su cvali leta i leta
šiškali su se za buketi
moja mat bi stela kolori i mirisi
rože veće manje više niže
za sveh nas
ki smo tu
i za onijsti ki su
tamo